Токио - Камакура

Токиод амьдрах болсноосоо хойш явсан анхны аялал, аялалын төлөвлөгөөтэй, хөтлөгчтэй, хамт олонтой тийм нэг аялалд оролцсон хэрэг.

Очсон газар маань Камакура. Токиод маш ойрхон(галт тэрэгээр ойролцоогоор 1цаг), цомхон, гэхдээ сонирхолтой, бас далайтай, нэг өдрийн аялалд яг л тохирсон газар байна.

Хотын дундуураа ганц том гол замтай, замын хоёр талаар дэлгүүр хоршоо, ресторанууд байрлана. Энэ зам ойролцоох уулын энгэрт байрлах 八幡宮/Hachimangu　сүмээс эхлэн далайн эрэг хүртэл үргэлжилээд, тэндээсээ эргээ дагаад хоёр тийш салах юм. Далайн эргийн элсэн дээр жижиг модон завьнууд харагдана лээ. Эргээс жаахан алсад surfing хийж байгаа хүмүүс, моторт завьнууд, бүр цаашилбал далайн эргийн амралтын газар бололтой том зочид буудал харагдана. Зун энд хүмүүс маш их ирдэг гэсэн, хавар ч бас ялгаагүй хүн ихтэй л байдаг юм байна.


Хүмүүс Камакура-г зорьдог бас нэг шалтгаан нь багахан хэмжээний явган аялал/hiking-н маршруттай холбоотой. Маршрут Хойд Камакура галт тэрэгний буудлын ойролцоогоос эхлээд 大仏/Daibutsu　буюу бурхан багшийн том чулуун хөшөөтэй сүмийн ойролцоо дуусна. Ойролцоогоор 2 цагын курс болно, гэхдээ нилээд өөдөө уруугаа, мод ихтэй, модны том том үндэснүүд хаа сайгүй ил гарчихсан, аялалын гутал өмсөөгүй хүнд жаахан хэцүүхэн л юм билээ. Урьд өдөр нь бороо орсон байсан болохоор шавар ихтэй, өгсөж уруудаж мацахад хөл хальтраад хэцүүхэн байх бололтой. Уулнууд нь жижигхэн хэрнээ, их огцом, бас нэг онцлог нь маш өтгөн модтой. Нэг ойд орсон бол сэрүү татаад, чийг үнэртээд сайхан юм билээ. Тэрэн дунд айлын байшингууд байх нь жаахан шигүү л болохоос биш манай лагерүүдийг санагдуулна. За уул ус бол нэг тиймэрхүү.



Камакура маш олон сүмтэй, тэднийг бүгдийг үзнэ гэж мэдээж байхгүй. Аялалыг зохион байгуулагчид маань 2-3 газрыг сонгосон байсан нь бодвол хамгийн үзүүштэй
газрууд байх. Үүний дотор дээр дурдсан 八幡宮/Hachimangu, мөн 長谷寺/Hasedera　хоёрыг заавал үзээрэй. Аль аль нь багагүй өндөрлөг газар байдаг болохоор орчин тойрон харагдаад зүгээр юм билээ. 八幡宮/Hachimangu дээрээс далайн зүг яваа гол замыг хараад амарч суухад, 長谷寺/Hasedera дээрээс далайн мандал, мөн surfing хийж яваа улсыг харахад бас нэг мэдрэмж төрөх нь дамжиггүй бизээ.

長谷寺/Hasedera-н гол сүмд байгаа босоо модон бурханы үүх түүхийг заавал сонирхоорой, надад маш их таалагдсан. Бас нэг дайраад гарахад гэмгүй газар бол 銭荒い弁財天/Zeniarai benzaiten сүм юм. Тэнд байх жижиг агуйгаас гарах булгын усаар угаасан мөнгө хоёр дахин үрждэг гэсэн домогтой юм билээ. Хүмүүс зоосон мөнгө, бас цаасан мөнгө 1000тын дэсвгэрт угааж харагдана лээ.


Аялалын эцсийн хэсэг нь Камакурагийн баяр байлаа. Камакурагийн баяраар морин дээрээс бай онох үзүүлбэр болдог юм билээ. Морин дэлэн дээр өссөн монгол хүмүүст бол гайхаад, сонирхоод байх зүйл болж чадахгүй л болвуу. Харин Камакура-д морь байнаа гэдэг чинь ойр хавьд нь морин тойруулга байдаг гэсэн үг, морь сонирхож байгаа хүнд бол тэр нь илүү сонин байж болох юм.

За эцэст нь Камакүра-д та юу хийж/үзэж болох вэ?
- далайн эрэг
- багахан хэмжээний явган аялал
- сүм дугана, түүний дотор Бурхан багшийн том чулуун хөшөө
- цагыг нь олж таарвал Камакурагийн баяр/Kamakura festival/鎌倉祭り　

Lladro shop at Ginza

August, 2008

Испани орон - Porcelain

Porcelain - гэдгийг шаазан гэж уг нь орчуулж болох байх. Гэтэл шаазан гэчихээр манайханд хятад шаазан толгойд нь буугаад байх байх гээд зориуд порселен гэж бичлээ.

Улс болгонд очиж ирээд хүнд онцолж ярих нэг юм байдаг бол Дани улсаас "Royal Copenhagen"-г хэлэх байсан байх. Энэ нь дэлхийн хамгийн алдартай шаазангийн брэндийн нэг, ур хийц өнгө будгаараа үнэхээр гайхагдсан энгийн нэг шаазан гэхээсээ урлагын бүтээл гэж тооцогдох болсон эд байгаа юм. Дэлгүүрүүд нь дэлгүүр гэхээсээ музей гэмээр... Үнэ гэвэл мэдээж үнэтэй, алганд багтах муурын зулзага гэхэд 80Eвро-гоос эхлэх байх шүү.

Валенсиад ирээд энд тэндэхийн юм сониучирхан харж байтал эдний "LLadro" гээд үндэсний порселен үйлдвэрлэгчийн үйлдвэр нь ч, төв нь ч Валенсиад байдгыг олж мэдлээ. Дэлгүүр нь яг хотын төвд, Plaza Ayuntamento орох замд байдаг юм байна. "Royal Copenhagen"-г ур хийц, өнгө үзэмжийн хувьд гүйцэхгүй ч их сайхан шаазан барималууд байна. Эмэгтэй хүн, эх үр, охидуудын гоо сайхныг илүүтэйгээр дүрсэлж харуулсан санагдсан. Намирсан үс, салхинд хийссэн хормой нэг л уянгалаг... энэ бүхнийг хийхэд ур хийц шаардсан нь мэдээж.

Бас нэг сонирхолтой, урьд нь харж байгаагүй зүйл гэвэл огт лак түрхээгүй шаазан эдлэлүүд байна. Ийм байдлаар хийсэн хүний баримлууд илүү амьд бодитой харагдаж байлаа. Лакгүй мөртлөө негр эмэгтэйн хүрэн бор шаазан баримал бүр ч илүү бодитой харагдана.

Надад хамгийн их таалагдсан баримал бол бяцхан хүүгээ гэдсэн дээрээ суулгаад эрхлүүлж байгаа ээж... Үс нь намирсан, агаарт хөвөж яваа маягтай зохиомжлогдсон байдалтай байлаа...

Испани орон - Ресторан

Хуралд оролцогсдын үдэлтийн зоог Baленсиагийн L'Oceonografic гээд далайн музейн ресторанд боллоо. Мэдээж энэ оройн хоол далайн хоол голлосон байх нь эргэлзээгүй. Өвөрмөц дизайнтай шилэн барилгад, өвөрмөц шийдэлтэй мөөгөн гэрлээр чимсэн дугуй зааланд ширээнүүдийг 10, 10 хүн суухаар засжээ. Үйлчлэгч нар нь их залуухан 20 дөнгөж гарч байгаа, дээр нь их сайхан бие бялдартай юм. Энэ талаар Баяраа бид хоёр дурдаад амжив. Бас нэг анзаарагдсан зүйл бол үйлчилгээний салбарын хүмүүс бүгд нилэнхүйдээ хар хувцас(хар өмд, цамц. энэ удаад харин урт хар хормогчтой байлаа) өмссөн нь цаанаа нэг цэмцгэр харагдуулж байлаа.

Оройн хоол мах голлосон, салатгүй(гайхалтай!!!), махны хачиранд нь ч салат байхгүй, виногоор даруулсан хоол байлаа. Хоолны эхэнд салатны оронд сармисаар амталсан загасны нухаш, дараа нь жигнэж шарсан загасны мах(shrimp хачиртай) цагаан виноны хамт, дараа нь мөөгний соустай үхрийн жигнэсэн мах улаан виноны хамт ирлээ. За ингээд ямар ч ногоогүй нэг оройн хоол идлээ. Хамгийн сүүлд desert болгож чихрийн хөөс ирсэн... Энэ нь Испанийн "meibutsu" бололтой.

Хоолны туршид нэг анзаарагдсан зүйл гэвэл "Lady FIRST!" гэдэг зарчмыг ягштал баримталдаг бололтой. Манай ширээнд би ганцаараа эмэгтэй байсан, бүх хоол мөн виног хундагалахдаа надаас эхэлж байсан нь нэг тийм үүрэг хариуцлагыг ноогдуулаад байх шиг сэтгэгдэл төрж байлаа. Манайд харин "Lady FIRST!" гэсэн зарчим ёстой байдаггүйн байна гэж саяхныг хүртэл бодож байсан үгүй юм байна лээ шүү. Украйн хоолны газар эмэгтэйгээс нь эхэлж хоолыг тарааж байх шиг санагдсан, би андуураагүй бол... Та бүгд очоод нэг үзээрэй, үнэхээр тийм ч байж болох.

Испани орон - Ус

Испанид мэдээж крантнаас ус уухгүй. Савтай цэвэр ус хэрэглэнэ. Савтай цэвэр ус нь ч гэхдээ нэг л сонин амттай юм. Савтай уснууд уг нь сайхан л амттай байдаг даа. Хойд Европын орнуудад ч гэсэн, Японд ч гэсэн уухад сайхан л санагдаж байсан. Гэтэл эдний ус буцалгаад хонуулчихсан ус шиг үлбэгэр амттай, уугаад амны цангаа тайлагдахгүй, дээр нь гэдэс дүүргээд байх юм. Баяраагийн хэлснээр хамаг учир "Испанид ус авчихаар өндөр уул байхгүй"-д байгаа бололтой.

Испани орон - Хоол хvнс

Валенсиад ирээд эндхийн El Corte Ingles гээд сүлжээ дэлгүүрийн хамгийн дээд давхарт байрлах food court-д анхны оройн хоолоо идсэн. Испани пизза их өөр юмаа, сүүлд Барселонд идсэн пизза ч мөн адил. Пиззаны гурил нь нимгэн хатуу гамбир шиг, дээрх хачир нь бага, бяслаг нь франц бяслаг лав биш испаний өөрийн нь цагаан бяслаг байдаг юм байна. Монголд иддэг пизза шиг бяслаг нь зунгааралдаад сунана гэж бодсон... Гэхдээ л маш амттай байсан шүү...

Espana орон хоол ундны төрөл зүйлээр хачин элбэг газар юм. Газар Дундын тэнгисийн самар жимс, ногоон дээр далайн баялаг cousine-г нэмчихээр юу болохов дээ... Миний л үзсэний хирээр харьцуулж зүйрлэвэл Turkey + Japan, нэг ийм л хоолтой газар юм. Ялангуяа baella, Испаний үндэсний хоол гэж байгаа. Нарийн ажиглах юм бол арабууд хавтгай хайруулын тавган дээр будааг тостой хуурч жигнэж иддэг, тэр л яг мөн санагдаад байх юм. Жаахан ялгаатай нь гэвэл соусаар хачирлаж, далайн амьтад нэмсэн байна.

Испанууд ер нь далайн амьтдыг нугасгүй их идэх юм. crab, shrimp, squid-г хамгийн их хэрэглэдэг юм байна. Ресторануудад нь "squid in butter" гэж menu-д нь харагдсан, бас crab-тай пизза гэж байгаа... ёстой сонин байгаа биз. Харин ногооны салат их байгаа байх гэж бодсон алга байна. Грек салатны бяслаг нь гэж жигтэйхэн их. Монголын ресторануудад грек салат гэхээр шар бяслаг зорж тавиад байдаг бол энд зөөлөн цагаан бяслаг хийдэг нь их ялгаатай санагдлаа. Манайд угаасаа зөөлөн цагаан бяслаг хайгаад олддоггүй болохоор(Nomin, Sky-д зардаг германаас оруулж ирсэн, хугацаа нь бараг дууссан бяслагыг эс тооцвол) шар бяслаг хийдэг юм болвуу... аль нь жинхэнэ грек салат юм бол... Бяслагны салат гээд захиад орхисон 2,3-хан улаан лоольтой таваг дүүрэн цагаан бяслаг хүрээд ирснийг бодоход ногооны салат ч иддэггүй улс бололтойдог.

Bazaar - Нөхрийн маань япон багш зах л орж үзмээр байна гэсний дагуу "Avenda Maria Christina"-д байрлах захаар орлоо. Захын барилга нилээд хуучных болох нь гаднаас нь харахад л илт. Хараад байсан Стамбулын сүмүүдтэй их төстэй, пөмбөгөр оройтой, гаднах хана нь Ottoman-ы үеийн цэцэг жимсэн хээтэй, нэг л тийм лалын сүмийг санагдуулам... Тэгсэн Испани ер нь арабуудад эзлэгдэж байсан шиг санагдаад явчихлаа... Хэрэв тийм бол арабын соёлоос үлдэх нь аргагүй. Espana урагшаа Моrocco-той усаар хиллэдэг, тэндээс энд ирж суурьшсан, ажил хийдэг пакистанууд(Цена эгч л тэгэж хэлсэн шүү, миний харахад арабууд ч юм шиг) Барселоны зарим дүүрэгт мэдэгдэхүйц их юм байна лээ. Зарим хаяг, бие засах өрөөний хаягыг арабаар биччихсэн байхад "яагаад вэ?" гэж гайхаж байсан ийм учиртай байх нь... За захруугаа эргээд оръё.

Зах нь гэж нүд эрээлжилсэн олон янзын зүйл нэг дор байна. Нүдэнд туссан сонин зүйл гэвэл улаан лооль гэж хэдэн янз байнаа... Томоос жижиг хүртлээ наян сортын улаан лооль байна. Дээр нь загас, далайн амьтны төрөл зүйлийг яривал япончуудыг давнуу гэхээс ер дутахгүй нь. Японд зах гэж байдаггүйдээ ч тэр юмуу, Японд харж байгаагүй олон төрлийн далайн амьтад, загас эгнүүлэн тавьсан харагдана. Мэдэхээс squid, shrimp, crab, octopus, загаснаас salmon... Жирийн жуулчин миний нүдэнд ингэж тусаж байгааг бодоход өдөр тутмынхаа хэрэглээнд өргөн хэрэглэдэг бололтой. Бас гахайн бүтнээр утсан гуя өлгөсөн харагдана. Бас нэг дурдахгүй байж болохгүй зүйл бол яах аргагүй олив байна. Түрк шиг өөрсдөө олив тарьдаг болоод ч тийм байх ногоон, хар олив төрөл төрлөөрөө байна.

Испани орон - Валенсиа

Валенсиа санасныг бодоход жижигхэн хот байлаа. Жижигхэн хэдий ч үүх түүх ихтэй, Испанидаа 3-т ордог чухал хот юм. Хот дотор хаашаа ч явсан алхаад явахад нэг их ядрахгүй яг сайхан таараад байна. Хүмүүс нь нэг л сайхан тайван, тэр чигээрээ амралтын газар гэмээр. Хотын төвийн хуучны сүм, хуучны барилгуудтай газраа гудамж нь их нарийхан, байшингууд хоорондоо дэндүү ойрхон баригдсаныг харахад Стамбулын гудамжууд санаанд орж байлаа. Хотын төвөөс жаахан зайдуу болоод ирэхээр өргөн өргөн сайхан гудамжуудтай юм.

Валенсиагийн хамгийн чухал хэсэг бол яах аргагүй "Antiguo Cauce del Rio Turia" парк. Голын хөндийг парк болгосон нь нэг бодлын арай сэрүүн, нэг бодлын хотын машин тэрэг, дуу чимээнээс тусгаарлагдсан тийм нэг тайван орчныг бүрдүүлж байлаа.

Нөхрийн маань оролцох хурал Valencia Polytechnic University болох байсан тул нэг өдрийг тэнд өнгөрөөв. Сонирхолтой зарим нэг илтгэлд сууж, сургуулийн кампусаар жаал алхсан. Далай үнэртээд л... далай их ойрхон байгаа бололтой. Valencia Polytech.U. их том кампустай, хөл бөмбөгийн стадиум, теннисний талбай, номын сан, кафетериа, оюутны байр, хичээлийн байрууд гээд л америк маягын сургуульд байх бүх юм байна. Гэхдээ гол нь... байрууд нь өнгө хэлбэр дизайн сайтай, шат нь гаднаа байлаа гэхэд л гоё шийдэлтэй юм. Энд залуучууд нь scooter, motocycle их унасан харагдана.

Нээрээ нэг гайхалтай нь гудамжний 2 талаар, замын голоор дандаа дал мод тарьсан нь аргагүй л халуун газар юм даа гэж бодогдохоор. Энд өдөртөө +30-35C, оройдоо +25-28C байна. Үнэхээр халуун газар юмаа...

Залуучууд, хүүхдүүд - Залуучууд нь хичнээн сайхан бие хаатай, арьс нь өөгүй цэвэрхэн, зүгээр нэг борлуулсан биш алтан шаргал өнгөтэй, эсвэл жүржийн өнгөтэй ч юм шиг нэг тийм гоё арьстай юм. Европоор л дүүрэн наранд борлосон арьстай хүмүүс байхад Испаничууд илүү гоё харагдах нь юундаа юм бол... Испанийн нар далай хоёрт л учир байх шиг байна.

Хүүхдүүд нь харин нэг л өхөөрдөм хөөрхөн харагдаад байсан нь юуных юм бол гэж бодоод байсан булцгар, буржгар алтлаг үстэй, бас их цоглог чанга дуутайгийнх байх. Гудамжиндаа эсвэл ойролцоох тоглоомын талбайд хүүхдүүд багшран шуугилдах нь монголд байгаа шиг сэтгэлд дотно, тайван мэдрэмж төрүүлнэ. Эндэхийн хүүхдүүд инээсэн ч, уйлсан ч хүүхэд шиг цоглог дуутай юм. Япон ээж аав нар шиг тэгэж ч болохгүй, ингэж ч болохгүй гэж загнах хүн ер харагдахгүй...

Автозам, гэрлэн дохио - Bаленсиад гэрлэн дохиог тоодог явган зорчигч гэж алга. Машины зай завсар харж байгаад л улаан гэрлээр гүйгээд гарчих нь манайхантай төстэй. Ногоон гэрэл асчихсан байхад гарцаар гарах явган зорчигчдийн сиймхийгээр яваад өнгөрөх машинууд ч байна.

Түүх дурсгал - Хотын төв талбай "Plaza de la Ayuntamento"-р дээш өгсөн "Plaza de la Reina"="Queen's square" орж болно. Энэ хэсэг Валенсиагийн хамгийн төв хэсэг. Энд "Conjinto Catedralia", "Iglesia y torre de Santa Catalina" гэх 2 сүмийг заавал үзээрэй. Сүмийн ард "Plaza de la Virgen" гээд усан оргилууртай талбай байна. Энэ лав Bаленсиагийн хамгийн гоё талбай байх. Энэ талбайд цагаан тагтаа их цуглах юм билээ.

Испани орон - Барселонд газардав хийгээд анхны сэтгэгдэл

Spain, Barcelona - энэ 2 нэр саяхан болтол санаанд оромгүй хол сонсогдож байлаа. Гэр бүлийн маань хүн Valencia(Мадрид, Барселоны дараа орох Испаний 3 дахь том хот)-д хуралд оролцох болсноор энэ сайхан оронд хөл тавих боломж надад олдсон юм. Магадгүй та бүхэн энэ орны талаарх тоо баримт, үүх түүхийг жуулчдад зориулсан ном, интернетээс хангалттай ихээр олж мэдэж болох л доо. Ямар ч номон дээр дурдаагүй, монгол хүний нүдээр, тийм нэг Испани орныг та бүхэнд хүргэе гэсэн сэтгэлээр хувийн тэмдэглэлээсээ толилуулж байна...

Aeroflot-н онгоц үдшийн 23:30-д Barcelona Airport-д газардлаа. Цааш Valencia орохын тулд хот хоорондын автобус эсвэл галт тэргээр явна. Миний хувьд онгоц дэндүү орой буусан тул аль алиных нь сүүлчийн унаанд амжихааргүй байлаа. Шөнийн автобус хамгийн сүүлийнх нь 23:59-с хотын төвөөс, харин галт тэрэг 22:00-с байсан санагдаж байна. Хэрэв танд хуваарь нь хэрэгтэй бол галт тэрэгнийх www.renfe.es, харин мужаасаа хамааран хот хоорондын автобусны үйлчилгээ үзүүлдэг компаниуд нь өөр өөр байдаг юм билээ, Tarragona, Valencia орох бол ALSA компаний www.alsa.es хуудсаар зочлоорой.

Миний хувьд тэр шөнийг онгоцны буудал дээр өнгөрөөгөөд эхний метрогоор хот орж тэндээс галт тэргэнд суух байлаа. Ойролцоох хот Таrragona-д сурдаг танил эгч маань хэрэг гаргаж намайг тосохоор ирсэн байсан болохоор монголын сонин хуучилсаар шөнийг амархан өнгөрөөв. Тэр эгч маань намайг газарчилж галт тэргэнд суулгаж өгсөн. Сүүлд буцахдаа Барселонд 2 хонохдоо унааны учрыг сайн ойлгож авсан. Барселоны галт тэрэгний төв буудлыг Barcelona Sants гэх бөгөөд хот хоорондын бүх галт тэрэг энд зогсохоос гадна, хот дотрох метроны хэд хэдэн шугам дайран өнгөрнө. Харин хот хоорондын автобусны төв буудлыг Estacio de Nord гэх ба метрогоор очихдоо Line1 буюу улаан шугамд суун Arc de Triomf буудал дээр бууна. За энэ 2-г мэдэж байхад л Барселоноор дамжин өнгөрөхөд алзахгүй боллоо.

Испани ер нь халуун газар юм. Анх буугаад цаг агаар нь дулаахан, airport нь сэтгэлд дотно, хүүхнүүд нь өнгөлөг гоё, Испани орон надад таалагдаж эхэлсэн. Энд англиар ярьдаг хүн гэж алга. Англи хэл сурах шаардлага ч байдаггүй бололтой. Бүтээгдэхүүний сав баглаа боодол, тээврийн хаяг, буудал, гудамж талбай ер нь хаана ч англи үг ганц ч алга. Бас өөр нэг нүдэнд туссан зүйл бол хүүхнүүд нь их эмэгтэйлэг, өнгөлөг гоё хувцаслах юм. Бас бие хаа нь ч аятайхан, бэлхүүсээрээ нарийхан, үс гэзэг гоо сайхандаа нилээд анхаардаг бололтой. 3 жилийн өмнө Герман орноор явахдаа хүүхнүүдийнх нь энгийн даруухныг гайхаж билээ. Тэдэнтэй харьцуулахад испани хүүхнүүд аргагүй л ганган юмаа...

Испани юугаараа алдартай вэ? гэж Цена эгчээс асуусан "Хувцасны дизайнаараа" гэж хэлж билээ. Нээрээ ч Европд алдартай ZARA, Mango бүгд Испанийх юм байна. Ер нь одоо бодоод байхад Испани улс бүх төрлийн дизайн, уран барилга, урлагаараа хол тасархай хөгжсөн газар юм. Валенсиагийн барилгууд, зочид буудал..., Барселоний ч мөн адил барилгууд, шидэт усан оргилуур...

Миний блогт тавтай морилно уу

Анх 10 настайдаа аавынхаа ажлын газрынхантай Хэнтий аймгийн "Гурван Нуур"-руу хэд хоногоор автобус аялалаар явсан юм. Тэр миний хамгийн анхны аялал байлаа. Аав маань өдөр тутамд тохиолдсон аялалынхаа сонин хачныг(би л тэгэж боддог байсан, магадгүй хээр гараад бодсон бодол эргэцүүлэл ч байж болох юм) нэг дэвтэр дээр бичиж харагддагсан. Анх намайг авч явахдаа "аялалынхаа тухай тэмдэглэл хөтлөнө гэсэн тохиолдолд л дагуулж явна шүү" гэж билээ. Мэдээж аав намайг дагуулаад л явна. Хүүхдийн гэнэн зангаар үүнийг би мэдэж байсан. Тэмдэглэлээ харин бичээгүй юм даа. Бага байсан болохоор бичсэн бичээгүй би бүх зүйлсийг тодоос тод санадаг. Онон гол дээгүүр бирвазаар гарсан, Дадал суманд очоод 3 нуурт сэлсэн хийгээд, хамт явсан хүмүүсийн яриа, байгалын сайхан, ургамал ус бүгдийг тодоос тод санадаг. Гэхдээ аавын маань хэлсэн үг санаанаас гараагүй. Аялалд явсан мөртлөө тэмдэглэл бичээгүй минь ер мартагддагүй... тэгээд л би өдрийн тэмдэглэл бичдэг болсон. Яваа яваандаа хол газар явахдаа аяны тэмдэглэл бичдэг болсон доо. Тэгээд хол газрын сонин сайханаа хуваалцья, миний олж мэдсэн зүйлс хэн нэгэнд нь шинэ санаа болж магадгүй гэж бодоод аян замын тэмдэглэлээ та бүхэнтэй хуваалцахаар шийдлээ. Зарим газар дэндүү нурших, өөрийн бодлыг тулгах зэрэг тал байвал өршөөгөөрэй.